Pask eo hizio !
N'eus ket pell zo (e miz Ebrel n'eus ket da vezañ estonet kement-se) am eus klevet ma nized o kanañ un tamm rimodell, disket gante ba'r skol (Diwan, publik pe katolik, n'eo ket sañsubl pa gaver ar meems sioù enne toud) :
Pask eo, Pask eo,
Pask eo hizio
Aioù ! Set' aze brezhoneg deuz ar c'haerañ.
Anes komz deuz ar mod da zistagañ ("é-o", laket da rimañ gant "hizio", distaget [iz'jo] – petra zo kaoz e vez disket d'an nevez-vrezhonegerien, bugale hag all, lâred mod-se ? gwir eo zo kement a zoareoù da lâred ar ger-mañ, "hiziw", ken e c'haller bezañ nec'het o kemer unan da stumm standard : ['iSo], ['hiw], ha reoù all evel ['hirje], ['hirjo], ['hydy] evel amañ, ha ne gaozean ket deuz Gwenedourien ; ar peb gwellañ evid ur c'hKLT klasik a vefe ['hiw] pe ['hirjo])...
Anes komz deuz ar mod da zistagañ, neuze, e weler ur stumm fall hag a vez lennet pe klevet stank e-mesk tud an "Emsav" : *Pask eo hiziw* evid lâred kement ha "C'est Pâques".
N'eo ket e-giz-se 'vez lâret avat :
Pa vez eilpennet ar frazenn, e ta da vezañ :
"Hiziw ema Pask",
kar "ema" an heni a implijer evid en em lec'hiañ, pe vefe er spas pe en amzer. Hag ar frazenn adlaket en tu kontrel a zo :
"Pask zo hiziw"
evel e lârer "Ar sul zo", "Ar goañv zo" ha me 'oar-me.
Ha ne vefe ket kaeroc'h ar ganaouenn evel-henn :
Pask a zo, Pask a zo
Pask a zo hirio ?